TUKAE KIMYA KWA NINI?
Swaleh Suheil Abeid
Natoa nyingi shukuri	Haji Udii mwandani
Shairi lako ni zuri	ulosema ni yakini
Mavazi yalodhihiri	yanachangiya kuzini
Tumo katika hatari	tukae kimya kwa nini?
Zindukani tushauri	tukae kimya kwa nini?
Ni wajibu tuhubiri	tutangaze mitaani
Libasi za kikafiri	zikomeshwe majumbani
Tumo katika hatari	tukae kimya kwa nini?
Wake hawajisitiri	hata haya hawaoni
Ziwazi zao swadiri	na rangi za midomoni
Umbo lote ladhihiri	utosi hadi nyayoni
Tumo katika hatari	tukae kimya kwa nini?
Abaya wazikasiri	zawabana badanini
Kamwe haziwasitiri	zawaonya viungoni
Nyuso ziwazi dhahiri	nyele kupakwa launi
Tumo katika hatari	tukae kimya kwa nini?
Wamo katika ghururi	dada zetu majumbani
Vipindi vya kikafiri	katika telivisheni
Sana vimewaathiri	wazitamani fesheni
Tumo katika hatari	tukae kimya kwa nini?
Kasumba imewaghuri	kuiga ya Uzunguni
Marinda yalo kaswiri	yawafika mapajani
Nguo ziso desituri	waume waigizani?
Tumo katika hatari	tukae kimya kwa nini?
Na ya rijali kathiri	nao wamo hatiyani
Libasi zawaaziri	kuiga wamerikani
Wajiona ni wazuri	kumbe kama hayawani
Tumo katika hatari	tukae kimya kwa nini?
Suruale zilo kaswiri	na rangi za nyweleni
Wazivaa za hariri	nguo zabana mwilini
Na kipuli hunawiri	kimevawa shikioni
Tumo katika hatari	tukae kimya kwa nini?
Libasi za kikafiri	watisha hawajioni
Waenda tupu dhahiri	kwa kuigiza fesheni
Hata hawatahayari	zimewatoka imani
Tumo katika hatari	tukae kimya kwa nini?
Waume mwajiaziri	dhahabu mwavaliyani?
Vidoleni idhahiri	shingoni na kifuani
Wengine wajifakhiri	kwa bangili mikononi
Tumo katika hatari	tukae kimya kwa nini?
Libasi ziso za kheri	waja mwazitakiani?
Mwangiya kwenye kufuri	kinyume cha yetu dini
Mukiiga makafiri	mutaingiya motoni
Tumo katika hatari	tukae kimya kwa nini?
Kaditamati shairi	nimefika kikomoni
Natumuombe Qahari	atupe nyingi imani
Atuepushie shari	akhera na duniyani
Tumo katika hatari	tukae kimya kwa nini?