TOBA YA RABBI Muhammad Faraj Salem Al Saiy
Mikono ninainuwa	Ilahi Rabbinnasi
Huku nikiomba duwa	Ewe Maliki Mkwasi
Pekeyo Mwenye uluwa	Kwa mwengine haipasi
Rabbi tutakabalie	Ya Samiu ya Alimu
Niruzuku ghufurani	Niepushe na maasi
Nakuomba ya Manani	Dhamiri inanighasi
Naungua kifuani	Kama moto wa nuhasi
Rabbi tutakabalie	Ya Samiu ya Alimu
Kheri ukinishushia	Nasahau kwa wepesi
Mitihani yanijia	Mimi nazidisha kasi
Wewe wanichukulia	Miye nazidi kuasi
Rabbi tutakabalie	Ya Samiu ya Alimu
Ujalie ucha Mungu	Uwe kwangu ni libasi
Adui wako na wangu	Wasiwasi lkhannasi
Mfunge mtie pingu	Asiipate nafasi
Rabbi tutakabalie	Ya Samiu ya Alimu
Twa'a iwe ni sibugha	Nipambe kwa ikhlasi
Nikutii kwa faragha	pia mbele ya unasi
Uniepushe na zagha	Unitowe wasiwasi
Rabbi tutakabalie	Ya Samiu ya Alimu
Rabbi siku ya Miadi	Ninywe ndani ya gilasi
Aninywishe Muhamadi	Kiu kwangu iwe basi
Unirehemu Wadudi	Unipe Firidausi
Rabbi tutakabalie	Ya Samiu ya Alimu

Tafsiri: ya baadhi ya maneno:

1- Sibugha = 'Pambo'

Mwenyezi Mungu anasema: "Sibughatullah = Pambo la Mwenyezi Mungu." Al Baqarah -138

2- Zagha = 'Kupotoka'

Mwenyezi Mungu anasema: "Falamma zaaghu azaagha Llahu qulubahum = Walipo potoka, Mwenyezi Mungu aliziachia nyoyo zao zipotoke." Saff -5