MTUKUFU RAMADHANI

SWALEH SUHEIL ABEID

1

Kwa jina lako Rahimu naanza kusimuliya

Mola wetu Mkarimu Ya Rabi nijaaliya

Nikadiri kukhitimu haya nalokusudiya

Niusifu mwezi mwema mtukufu Ramadhani

                                   2 

Rabi peleka salamu zende kwa wetu Nabiya

Mtume wetu Adhimu Muhamadi Hashimiya

Na Swahaba Akiramu na Isilamu jamiya

Niusifu mwezi mwema mtukufu Ramadhani

                                   3

Ya Rabi tupe mwafaka tufunge bila udhiya

Saumu yenye baraka kwako twaitaradhiya

Tuifunge huno mwaka na mwakani kwa afiya

Tuufunge mwezi mwema mtukufu Ramadhani

                                   4

Karibu wetu mgeni kwa hamu twakungojeya

Ulotukuka yakini nuru ulivyo eneya

Mtukufu Ramadhani karibu twakupokeya

Kongo mwezi wetu mwema mtukufu Ramadhani

5

Mtakatifu adhimu sote twakukongoweya

Mwezi uliye muhimu Mola met’utunukiya

Twafurahi Isilamu kila pembe ya duniya

Kongo mwezi wetu mwema mtukufu Ramadhani

                                  6

Mtukufu mwezi mwema wa sisi kunyenyekeya

Mwenye kuyatenda mema bila ya kufanya ri’ya

Tamswamehe Karima madhambi kumfutiya

Kongo mwezi wetu mwema mtukufu Ramadhani

                                   7

Mwezi wa nyingi faida metukuzwa na Jaliya

Mwezi mwema wa Ibada na imani kutungiya

Huondoka zote shida nafusi zikatuliya

Kongo mwezi wetu mwema mtukufu Ramadhani

                                   8

Mwezi huno wa maana ameusifu Nabiya

Ni bora wajulikana kwa kheri nyingi kungiya

Mwezi wa neema sana baraka hutushukiya

Kongo mwezi wetu mwema mtukufu Ramadhani

  9

Mwezi mwema wa swiyamu wa mema kujichumiya

Milango ya Jahanamu Rahimu huifungiya

Na ya Janatu Naimu wazi hutufunguliya

Kongo mwezi wetu mwema mtukufu Ramadhani

 10                                     

Ni mwezi wa Quraani mwanzo kuteremkiya

Alipokuja pangoni Jibirili kwa Nabiya

Ilikiuwa Ramadhani wah’ayi alipokeya

Kongo mwezi wetu mwema mtukufu Ramadhani

 11

Mashetani makafiri wawi wa kuharibiya

Hawawezi kuathiri wasiwasi kututiya

Huwafungia Qahari mbali wakatokomeya

Kongo mwezi wetu mwema mtukufu Ramadhani

 12

Imo Lelatil Qad’ri usiku huo kungiya

Bora sana mashuhuri kuliko elifu moya

Miezi inayo jiri ya taqwimu Hijiriya

Kongo mwezi wetu mwema mtukufu Ramadhani

 13

Na hushuka Malaika mbinguni wakatokeya

Kwa amri ya Rabuka duniyani kufikiya

Amani hunawirika hadi swabahi kungiya

Kongo mwezi wetu mwema mtukufu Ramadhani

 14

Usiku mwema kipita wakati huo kungiya

Na ukija kukukuta Ibadani umengiya

Hakika utaipata Rehema yake Jaliya

Kongo mwezi wetu mwema mtukufu Ramadhani

                                           15                               

Haya basi Isilamu mgeni ashaingiya

Natutimize saumu tuifungeni kwa niya

Swala zote tuzikimu za suna na faridhiya

Kongo mwezi wetu mwema mtukufu Ramadhani

                                   16

Mashekhe na masharifu wahimizeni jamiya

Hima tufungeni safu Tarawehe kuqimiya

Tumlekee Raufu kwa kuomba na kuliya

Kongo mwezi wetu mwema mtukufu Ramadhani

                                   17 

Darasani tuhimize wenzetu kuhudhuriya

Kwa wakati tufulize misikitini kungiya

Mawaidha tusikize atatujazi Jaliya

Kongo mwezi wetu mwema mtukufu Ramadhani

 18

Haya shime muombeni Mola kumnyenyekeya

Quraani isomeni kila siku juz’u moya

Mukiweza ongezeni muzidi kukaririya

Kongo mwezi wetu mwema mtukufu Ramadhani

19

Na akhiri nimefika beti nalokusudiya

Chache naloziandika tosha kumi na tisiya

Namshukuru Rabuka shairi limetimiya

La kuswifu mwezi mwema mtukufu Ramadhani

20

Amina Rabi Dayani Dua yetu kubaliya

Ya Ilahi tuauni tuepushe na udhiya

Tuifunge Ramadhani kwa furaha na afiya

Twaomba yake neema mtukufu Ramadhani