Jamani mbona vishindo?

Jamani msiwe kando Muone ya duniani

Zilizali kwa vishindo Vimbunga na matufani

Vinagonga kama nyundo Havisiti abadani

Ufisadi wadhihiri Baharini na barani

Tsunami ilibashiri Kimbunga cha baharini

Indonesha Kashimiri Bara Hindi na Japani

Ikafika taathiri Hadi kwetu visiwani

Ufisadi wadhihiri Baharini na barani

Katirina kikafwata Kikaja kikinguruma

Mvua bila kusita Na upepo wa naqama

Miti ilikatakata na majumba yakazama

Ufisadi wadhihiri Baharini na barani

Kikaja kimbunga Rita Dharuba ya ufukweni

Kilipiga na kusita Ikawa ni afueni

Kwa haraka kikapita Mitaa ya pwani pwani

Ufisadi wadhihiri Baharini na barani

Kukazuka zilizali Bara hindi Afghani

Kilishitadi ukali Nchini Pakistani

Roho pia amuali Hasara iso kifani

Ufisadi wadhihiri Baharini na barani

Sasa bara Afrika Ukame umeenea

Njaa isiyosemeka Miti haitaki mea

Mazao yaatilika Na roho zinapotea

Ufisadi wadhihiri Baharini na barani

Baharini na barani Ufisadi wadhihiri

Bila hofu ya Manani Maasi yanakithiri

Hatujali hatuoni Tunavamia kikiri

Ufisadi wadhihiri Baharini na barani

Wapi tunaelekea Mbeleni hatutizami

Ina ghururi dunia Tunaona hatusomi

Hatutaki kusikia Tunazidi hatukomi

Ufisadi wadhihiri Baharini na barani

Muhammad Faraj Salem Al Saiy

--------------------------------

Huyu anataharuki

Huyu anataharuki na yule anakimbia

Wazama hawaibuki kwa anasa za dunia

Ana tabu makhluqi dunia kun'gan'gania

Kila kitu tahiliki ila uso wa Jalia

Anadhani haondoki milele atabakia

Hajali hashughuliki ya kesho kufikiria

Atapoitwa na Haki hana pa kukimbilia

Kila kitu tahiliki ila uso wa Jalia

Hapana kitachobaki wala kitachosalia

Ila Wajihi wa Haki uso wa Mola Jalia

Huwezi sema sitaki wala hata kukimbia

Kila kitu tahiliki ila uso wa Jalia

Kila kitu tahiliki Qurani yatuambia

Sasa kwa nini hutaki mbegu njema kufukia Upate njema riziki na rehema za Jalia

Kila kitu tahiliki ila uso wa Jalia

Allahu wetu khaliqi mengi katutunikia

Sisahau yako haki sehemuyo ya dunia

Na hayo uyadiriki Mola alivyousia

Kila kitu tahiliki ila uso wa Jalia

Kwa wema uwe shabiki watu kuwatunukia

Hata asostahiki wewe uwe maridhia

Ufisadi ni halaki iepuke yake njia

Kila kitu tahiliki ila uso wa Jalia

Mola wetu warehemu walokwisha tangulia

Nanyi mlobaki humu msidhani tabakia

Angebaki muadhamu habibi wetu Nabia

Hapana atayebaki ila uso wa Jalia

Muhammad Faraj Salem Al Saiy

Msalieni Nabiya (r)

Mola amemswalia	Kipenzi chake Hashimu
Kisha wakafuatia	Malaika wakarimu
Na nyinyi umma jamia	Swalini mumsalimu
Msalieni Nabiya	Na ali zake kiramu
Na Swahaba zake pia	Ziwafikie salamu
Wao walitangulia	Kunusuru Isilamu
Yarabi Mola Jalia	Waja wako warehemu
Msalieni Nabiya	Na ali zake kiramu
Kifua kapanuliwa	Hana shaka wala dhana
Utajo kanyanyuliwa	Kwa shahada na adhana
Mizigo kaondolewa	Dini yake ikafana
Msalieni Nabiya	Na ali zake kiramu
Katuletea risala	Ujumbe kaueneza
Kaamsha walolala	Wakauona mwangaza
Mefika kila mahala	Nuru ameisambaza
Msalieni Nabiya	Na ali zake kiramu
Kakileta Jibrili	Mtume kakipokea
Kitabu kilo kamili	Kiso shaka Katwambia
Na vizimwe vibatari	Mwanga ushatufikia
Msalieni Nabiya	Na ali zake kiramu
Kandili zote zimeni	Tunacho cha kuonea
Maneno Yake Manani	Risala ilotimia
Uwongofu Qur-ani	Kwa amchae Jalia
Msalieni Nabiya	Na ali zake kiramu
Kote zimeshaenea	Baraka za Subuhana
Nuru katufikishia	Muhamadi kwa amana
Nasi tumeipokea	Jamii muuminina
Msalieni Nabiya	Na ali zake kiramu
Kitabu hiki adhimu	Mola ameweka wazi
Kupitiwa na kalamu	za viumbe hakiwezi
Jinni wala binadamu	Kakihifadhi Mwenyezi
Msalieni Nabiya	Na ali zake kiramu
Sunnah ilotahirika	Kufuata ni lazima
Mafunzo yenye hakika	Ilimu na tarjima
Ni kauli ziso shaka	Maneno aliyosema
Msalieni Nabiya	Na ali zake kiramu
Awe ruwaza njema	Annabiyul khatimu
Tusiwe tu  twasema	Tufuate kwa timamu
Kufuata ndiko kwema	Uzushi hautodumu
Msalieni Nabiya	Na ali zake kiramu
Ya Rabbi Mola Adhimu	Tunakuomba atiya
Ya Rabbi utukirimu	Utuweke na Nabiya
Na Sahaba wakarimu	Walofuata yake njia
Msalieni Nabiya	Na ali zake kiramu
Muhammad Faraj Salem Al Saiy

Watoto wangu vipenzi

Rabi Khaliqul Ibadi Mikono nainyanyua

Mitupu isijerudi Ipokee yangu dua

Nakuomba Ya Wadudi Kwa moyo uliotuwa

Ya Ilahi Ya manani Waepushe na balia

Watoto wangu vipenzi Uwajaze na imani

Waongeze tarkizi Waifuzu mitihani

Uwe kwao ni Mlinzi Ya Rabi Ya Rahamani

Ya Ilahi Ya Manani Waepushe na balia

Waepushe na shetani na kila unochukia

Waongoze kwa amani ya akhera na dunia

Wafwate watamakani Sirati Ilo sawiya

Ya Ilahi Ya Manani Waepushe na balia

Wahifadhi Qur’ani na masomo yao pia

Wasali misikitini ni sunnah yake Nabiya

Wasiache abadani Kukutii ya Jaliya

Ya ilahi ya Manani waepushe na balia

Waepushe na haramu wao na wenzao pia

Wana wa kiislamu kila pembe ya dunia

Wafunuwe wafahamu wawe Kwako maridhia

Ya ilahi ya Manani waepushe na balia

Muhammad Faraj Salem Al Saiy

--------------------------------

Toba ya Rabb

Mikono ninainuwa Ilahi Rabbinnasi

Huku nikiomba duwa Ewe Maliki Mkwasi

Pekeyo Mwenye uluwa Kwa mwengine haipasi

Rabbi tutakabalie Ewe Samiu Alimu

Niruzuku ghufurani Niepushe na maasi

Nakuomba ya Manani Dhamiri inanighasi

Naungua kifuani Kama moto wa nuhasi

Rabbi tutakabalie Ewe Samiu Alimu

Kheri ukinishushia Nasahau kwa wepesi

Mitihani yanijia Mimi nazidisha kasi

Wewe wanichukulia Miye nazidi kuasi

Rabbi tutakabalie Ewe Samiu Alimu

Ujalie ucha Mungu Uwe kwangu ni libasi

Adui wako na wangu Wasiwasi lkhannasi

Mfunge mtie pingu Asiipate nafasi

Rabbi tutakabalie Ewe Samiu Alimu

Twa'a iwe ni sibugha Nipambe kwa ikhlasi

Nikutii kwa faragha pia mbele ya unasi

Uniepushe na zagha Unitowe wasiwasi

Rabbi tutakabalie Ewe Samiu Alimu

Rabbi siku ya Miadi Ninywe ndani ya gilasi

Aninywishe Muhamadi Kiu kwangu kiwe basi

Unirehemu Wadudi Unipe Firidausi

Rabbi tutakabalie Ewe Samiu Alimu

Muhammad Faraj Salem Al Saiy

Tafsiri: ya baadhi ya maneno:

1- Sibugha = 'Pambo'

Mwenyezi Mungu anasema: "Sibughatullah = Pambo la Mwenyezi Mungu." Al Baqarah -138

2- Zagha = 'Kupotoka'

Mwenyezi Mungu anasema: "Falamma zaaghu azaagha Llahu qulubahum = Walipo potoka, Mwenyezi Mungu aliziachia nyoyo zao zipotoke." Saff -5